Augustus

Wow... dis 'n unieke jaar hierdie...

Daar is bitter baie dinge wat gebeur het, en besig is om te gebeur... Lekker!

Toe julle almal lekker gewerk het/eksamen geskryf het/vakansie gehou het, was ek op my Lisensiaat-Toer in Natal. Dit was die eerste en langste toer in 6 jaar wat ek nie self bestuur het nie! Dit was regtig lekker gewees, behalwe natuurlik vir die lang ry. Ons was 5 van die 12 dae op die bus - heeldag. Dankie baie vir 'n iPod en 'n Laptop wat met GPRS op die 'Net kan kom, anders sou ek dit verseker nie gemaak het nie!

Die 15e Junie was ek terug op Stellenbosch, en het die inhaal begin. Slapelose nagte en langer dae het gevolg. Die goeie nuus is dat ek darem amper op datum is (uiteindelik)! Het ook 'n paar keer gepreek by Stellenberg deur die vakansie. Ek is tans druk besig om die Mediasentrum (biblioteek) by die kerk klaar te maak, dit open op 13 Augustus. Ook op daai liewe dag sal die nuwe website van die kerk live gaan. Na amper 5mnde se design en rondspeel met idees het ons besluit om WEER die site te dump en oor te begin... So julle kan dink wat ek vir die volgende 72uur gaan doen :)

Daar is nog net 3mnde en twee weke van studie oor... die uurglas begin nou lekker leeg loop. Kan nie wag daarvoor nie. Het verlede Woensdag weereens 'n jaarlikse Bybelkenniseksamen geskryf - was hierdie slag darem makliker, so ek glo nie daar sal pyne wees nie.

'n Update oor volgende jaar: Lyk my die Londen ding gaan actually nie gebeur nie! Nie dat dit nie kan werk nie, maar dat ek besig is om 'n opsie of twee hier in SA oorweeg wat dalk in die langtermyn vir my tog 'n beter besluit sal wees. Sal julle inlig as ek enigsins meer inligting het. Wat wel interessant is, is die verskuiwing wat tans in my lewe aan die gang is. Ek kan voel hoe ek myself van die student-wees ding begin lostrek en myself vir 'n werkende lewe begin oriënteer - dis amazing om weer 'n slag 'n nuwe challenge op die tafel te hê. Soos meeste van julle weet is Stellenbosch huis nr. 12 gewees, en 6 jaar daarvan, wat ook die langste was. Seker nou maar weer tyd om aan te beweeg, alhoewel ek dink dit sal vir eers maar nog in die Kaap bly! Benna kom ook November terug uit London, lyk of ons volgende jaar in 'n flat of upgraded grot gaan bly :)

En in ander nuus... julle raak verloof asof dit uit die mode uitgaan! Baie geluk en baie sterkte - julle weet wie julle is.

Vir die van julle wat worry oor 'n 5am blog-post, moenie worry nie, ek slaap deesdae baie beter...

Groete,

M:)